Прыпеўкі да "Кракавяка"

А ведай ты, дурню,
Што я цябе люблю!
Каля цябе стою,
З цябе сьмешкі строю.

Каб гарэлкі чарку,
То б я напілася;
А за добрым мужам,
То б я нажылася.

****************

А мой мілы харошы,
Купіла я за грошы,
Апалала ачыма,
Зарабляла плячыма.

*****************

Сьвеці, месяц, сьвеці
Каля маёй студні;
Закахацца латва,
А расстацца трудней.

******************
(макаранічныя)
Паненачко ладна,
Цо ты бэньдзеш ядла?
Гарошак ня ўродзіў,
Капуста пшэпадла.
А ў капусьці гола косьць,
І на тую прыбыў госьць.